Job 39

1U nunure laka ra e na kinakava kai ra umana kuabar na me ta ra lualuana,
Ba u gire ra kinakava kai ra umana tana na are?
2I tale u laka pi una luk ra umana gai dia kap bala tana,
Ma u nunure ba vingai diat a kakava?
3Dia va timtibum, dia kava vue ra umana natu i diat,
Ma dia gugu tana.
4A umana natu i diat dia potar, dia tavua vanavana ta ra bala na vura;
Dia vana irai, ma pa dia talil tadav ra umana tavu i diat.

5To ia i ga vaki ra kuabar na as upi a leing?
To ia i ga pala ra umana vivi ai ra as,
6Nina iau ga tabar ia ma ra bala na kunai upi a kubana,
Ma ra pia na solt upi kana gunan?
7Pa i mainge ra varvareo ai ra pia na pal,
Ma pa i valongore ra nilai nina i kure ra vinavana kai ra umana as.
8I vana vurvurbit ta ra lualuana,
Upi na tikan upi ra umana mapmapina dia kalabar.

9Dave, a kuabar na bulumakau na gugu pi na toratorom piram?
Dave, na ki bulu ta kaum pal na vavaguai?
10I tale u laka pi una kun tar ia ta kaum ipipuk?
Dave, na mur u ma na ragu ta ra umana odo?
11Dave, una nurnur tana tago i dekdek,
Ma una nur tar ra papalum ta kaum uma pirana?
12Dave, una nurnur tana ba na kap pa kaum kon,
Ma na varurue ta kaum tavul a rararama vuai?

13Ra murup i kopkop ma ra nilagar;
Ma dave, a bebeana i nunure ra varmari?
14I nur vue ra umana kiauna ara ra pia,
Upi diat a malamalapang ta ra tobon;
15Pa i vinar ba ta pal a kau tana na rua pamar diat,
Ba ta leing na rigi diat.
16A balana i leo ure ra umana natuna, dari bea diat vakir kana;
Ma pa i nuk pa ia, ba i papalum vakuku;
17I vuna tago God i ga tak vue ra kabinana kan ia,
Ma pa i ga tul tar ra minatoto pirana.
18Ba i tut upi na vilau,
I nongone ra os ma nina i ki tana.

19Dave, u ga tul tar ra dekdek ta ra os?
U ga vung bula laka ra ivuna nina i varvarongo ta ra inoana?
20Dave, u ga kure ba na pil da ra kubau?
A dekdek na nilaina ia ra magit na bunurut.
21I ruarua ra male, ma i gugu ta ra dekdekina;
I vana upi ra vinarubu.
22I kulume ra bunurut, ma pa i bilua ra nuknukina,
Ma pa i vilau kan ra pakat na vinarubu.
23Ra popopoi na pu i talatalenge,
Damana bula ra rumu i bagabagele ma ra rumu i mangi.
24I konome ra pia ta kana karangap na kankan,
Ma ba di pupunge, i mama tur vovovon.
25Ba ra tavur i tangi, i biti: Ioi!
Tago i lung ra vinarubu maro vailik,
A varvareo kai ra umana luluai na vinarubu, ma ra kunukula.
26Dave, ra taragau i bebe alalir ta ra maup ta kaum kabinana,
Ba i pururung uro ra matana taubar?
27Ba ra minigulai i pururung tutua,
Upi na pait kana po arama liu iat,
Ivuna laka ta kaum varkurai?
28I rakan arama iat ta ra papar a vat, ma i ki ka
Ta ra ngu na vat ma ta ra pakana i bakit.
29I gire ra ana kirip marama liu iat;
Ma i bobe ma ra kiau na matana maro vailik.
A umana natuna dia rum ra gap;
Ma i ki ta ra pakana a umana virua dia va tana.
30